مي كساب تكشف عن أسباب جديدة وراء القبض على زوجها
دافعت الفنانة مي كساب عن زوجها الفنان الغنائي "أوكا" برسالة جديدة كتبتها من خلال حسابها الخاص على إنستجرام، وقالت فيها: "كل اللي يعرفني من قريب يعرف كويس أني عمري ما كرهت حد ولا عمري أذيت حد ولا عمري عملت تصرف مخل بالشرف ولا اتنازلت عن شرفي ولا كرامتي في يوم من الأيام".
وإستطردت "واستحملت ظلم كتير واضطهاد ومحسوبيات، وكنت طول الوقت باصبر نفسي بكلام أبويا الجميل اللي رباني على القناعة، كان دايما يقولي انتي عاملة زي عسكري في الجيش كل شويه بيترقى بجهده وتعبه ويتنقل من سلاح لسلاح".
وكشفت الفنانة كساب، بقولها: "أنا مريت بظروف صعبة كتير في حياتي بس للأسف بقالي 4 سنين مش باشوف يومين حلوين على بعض، انا باعيش أقسى أيام حياتي من يوم ١ /١٢ /٢٠١٢ يوم ما اكتشفت أن أمي عندها السرطان، وانا مش مي انا واحدة تايهة مش لاقية نفسها موت أمي كسرني، ومن بعدها احداث كتير قوي وجعتني القريبين مني عارفين".
وأضافت: "انا استحملت حاجات صعبة كتير اد ايه السنين اللي فاتت، بس الصراحة ده اصعب موقف اتحطيت فيه من يوم ما اتولدت مش عشان ده جوزي وحب عمري وإحساسي بعدم وجوده جمبي كان روحي متاخدة من جسمي، لا عشان متأكدة أنه مظلوم متأكدة انه ضحية طيبته وسذاجته، وللاسف ضحية تعليمه المتواضع الضحل، ضحية ثقته الزيادة عن اللزوم في أي شخص يقرب منه ويضحك عليه ويقوله انا هاعملك ويوعده وعود كدابة وفي الآخر يستغله ويورطه، طبعا لما باتكلم عن محمد كأني باتكلم عن احمد كمان أوكا وأورتيجا روح واحدة في جسدين".
وتابعت: "ثقتي في رب العالمين كبيرة جدا أنه هينصرهم ويفك كربهم ثقتي في عدالة القضاء العسكري كبيرة انه مش هيظلمهم ثقتي في قلوبكم الرحيمة كبيرة إنكم هتقفوا جمبهم ادعولهم وادعموهم".